Gan fod dim un canolfan gofalwyr yn Rhondda Cynon Taf (RCT) a Merthyr Tudful, roedd angen dull gwahanol. Gan weithio gydag Ymddiriedolaeth Gofalwyr Cymru, dosbarthwyd £80,000 i 11 o sefydliadau llawr gwlad ar draws y rhanbarth.
Mae’r prosiect wedi ysgogi rhai partneriaethau gwych ac wedi gwneud gwahaniaeth gwirioneddol i fywydau gofalwyr
Coed Lleol
Mae Age Connects Morgannwg yn cytuno, “Roedd y prosiect hwn yn wych i fod yn rhan ohono. Roedd cymaint o bositifrwydd mewn gallu cynnig strategaeth ymdopi neu gyfle i wneud rhywbeth drostynt eu hunain i bobl oedd angen cefnogaeth.”
Cafodd pob prosiect effaith enfawr ar fywydau’r gofalwyr y gwnaethant eu cyrraedd, a chafodd rai effeithiau cadarnhaol ehangach ar y sefydliadau yn ogystal â’r gofalwyr. Dyma ddim ond un neu ddau o’r straeon….
Yng nghanol ei bywyd prysur, cafodd Sarah* ei hun yn gofalu am ddau o blant ag anghenion dysgu ychwanegol ac yn rhiant ag anabledd, a hyn oll wrth gydbwyso gwaith rhan amser. Roedd yn llwyth heriol, gan ei gadael yn teimlo wedi ei llethu ac yn ynysig. Gan chwilio am gysylltiad â phobl eraill oedd yn deall, ymunodd Sarah â Becca’s Besties, grŵp cymunedol ar gyfer gofalwyr. Yma, daeth o hyd i rwydwaith cefnogol o unigolion yn wynebu heriau tebyg, gan gynnig cyngor ymarferol ac oedd yn barod i wrando. Drwy Becca’s Besties, cafodd Sarah gymorth proffesiynol, gan gynnwys cyngor ar faeth, iechyd a lles emosiynol. Roedd yr adnoddau hyn yn werthfawr iddi allu ymdopi â gofynion gofal yn fwy effeithiol.
Yn hollbwysig, manteisiodd Sarah ar seibiannau mawr eu hangen, gan fwynhau ymweliadau i Ganolfan Mileniwm Cymru ac ymweliadau llesol â chyfleusterau sba. Cynigodd y seibiannau hyn gyfle iddi fagu nerth newydd a myfyrio, gan ddarparu rhaff achub hanfodol yn ei thaith gofal. Gan fyfyrio ar ei phrofiad, mae Sarah yn cydnabod effaith ddwys cymorth cymunedol. “Heb y grŵp hwn, dwi ddim yn gwybod sut y byddwn wedi ymdopi,” mae’n cyfaddef. “Mae gofalu am fy nheulu wedi bod yn flinedig iawn, ond mae Becca’s Besties wedi bod yn ffynhonnell o gryfder ac undod.”
Mae stori Sarah yn amlygu pwysigrwydd rhwydweithiau cymorth i ofalwyr, gan ddangos sut y gall cysylltu â phobl a chymorth ymarferol wneud byd o wahaniaeth wrth lywio heriau gofal.
Mae gofalwr arall yn dweud ei stori wrthym…
“Fel gofalwr di-dâl i fy Mam, sydd wedi cael diagnosis o ddementia yn ddiweddar, mae cyfnodau o seibiant a llawenydd yn drysorau prin. Roedd y daith i Lundain ar gyfer y sioe gerdd “Wicked”, gweld atyniadau’r ddinas, a phryd o fwyd hyfryd yn ddihangfa lwyr. O’r eiliad y camais ar y bws i gychwyn ar yr antur hon, roeddwn yn teimlo mwy a mwy o gyffro a disgwyliad yn cynyddu ynof. Roedd y cyfle i ymgolli yn hud y theatr, i gael fy nghludo i fyd mympwyol Oz, yn brofiad y byddaf yn ei drysori am byth. Roedd y cynhyrchiad yn syfrdanol, a chefais fy hun wedi ymgolli’n llwyr yn y stori hudolus, gan anghofio’r cyfrifoldebau oedd yn aros amdanaf gartref.
"Hefyd, fe wnaeth y cyfle i weld strydoedd bywiog Llundain ochr yn ochr â gofalwyr di-dâl eraill greu llinyn cyswllt rhyngom a fydd yn para tu hwnt i’r daith hon mi wn. Roedd rhannu straeon, chwerthin, ac ambell i ennyd o ddealltwriaeth gydag unigolion sy’n troedio llwybr tebyg yn gysur ac yn codi calon. Roedd yn fodd i’m hatgoffa nad wyf ar fy mhen fy hun ar y daith hon a bod digon o gefnogaeth ar gael.
"Roedd cael ein tretio i bryd o fwyd blasus yn gyfle i ymlacio a mwynhau cwmni’n gilydd mewn lleoliad hamddenol. Roedd cael mwynhau pryd o fwyd heb boeni am gyfyngiadau amser neu ddyletswyddau gofalu yn bleser prin.
Mae’r diwrnod hwn o seibiant wedi atgyfnerthu fy ysbryd mewn ffyrdd na allaf eu mynegi’n llawn.
Mae wedi f’atgoffa o bwysigrwydd hunanofal a gwerth cymuned. Diolch enfawr am wneud y profiad hwn yn bosibl. Rwy’n hynod ddiolchgar am y llawenydd a’r cysur rydych chi wedi dwyn i mewn i fy mywyd.”
*Newidir enwau i ddiogelu preifatrwydd